الاثنين، 15 سبتمبر 2008

مش عارفه اقولك ايه

مش عارفه اقولك ايه ........

اقولك معلش ولا طيب ولا ايه

اي كلمه من دول بحسها هبله في موقف زي دا

بس كل الي اقدر اقوله

حاول تقوي عشان تعيش و تقدر تتكيف مع الظروف المتدهوره في بلدنا دي

مش عارفه اقولك ايه اذا كنت انا نفسي تعبانه جدا و اتحولت لحد عصبي

.....جايز كنت تعرف حد تاني زمان و لو عرفته عن قرب اكتر جايز تصدم لتغييره

كلنا اتغيرنا

كلنا الهم ساب فينا اثره


دا كلامي الي ما قدرتش اواجه بيه صاحب عزيز عاليا متضايق شويه لما جيت اسلم و اتكلم زي اي يوم

..............

هحكي لكم الموقف التالي و شوفو هتقدروا تقولوا ايه ليه

دلوقتي فيه موضه طالعه اسمها النوم عالعربيات و القعده عالعربيات دون ادني مراعاه للشخص و عربيته

قد ايه ممكن يكون هوا او اهله تعبوا فيها او قد ايه عزيزه عاليه او هوا بيحب شكلها يكون حلو ازاي

و انتشر برضه تكحيت العربيات بالمفاتيج عشان دهانها يتشوه

طيب

ماشي طنشنا و كبرنا دماغنا

لكن لو حد قعد علي عربيتك و فرش اكله و قعد ياكل و ياخد الشاي و مستمتع اوي

و تيجي تقوله اوعي

عربيتي........

ابسط حقوقك يعني

يزعق لك و يستاء

دا اسمه ليه

للدرجه دي وصلنا لعدم الاحساس بالمسئوليه

و التعدي علي ممتلكات الغير اصبح حق اصيل من حقوق المواطنه


تفتكروا لو حد عمل في عربيتكم كدا

صغيره او كبيره

قعد عاليها او ناااااااااااام عاليها

تعمل ايه لو شوفت المنظر دا خاصه في مواجهه ثقافه بلطجه جامده انتشرت وبقت هيا القانون

و لو زعقت او اعترضت

TWIST AND SHOT

براحتك اخبط دماغك في الحيط

لو كنت مكاني

تقول ايه لهذا الصديق في ظل ان اي كلمه هتبقي مواساه هبله !!!! و جبر خواطر مش بيحل مشاكلنا


و ما تزعلش لاني حولت الخاص الي عام لما جيت اكتب عن مشكله جايز البعض يشوفها عاديه

بس انا مش بيحركني غير المشاكل اكتبها

بقت ادمان الظاهر

من كتر ما شايفينها


هناك 7 تعليقات:

غير معرف يقول...

زعلان علشان كدة


عارفة.أيوة دي حاجة بتاعتك..وزعلان عليها..


ليه حد يشوه لك حاجة عزيزة عليك

dr.lecter يقول...

بصي هاقولك حاجه انا مش مقتنع بها بس ده بقي العرف وسلو بلدنا

عاملي الناس زي ماهم بيعاملوكي بجد

وانت ادري بقي مني هتعامليهم ازاي وكل واحد علي قد سلوكه

الكلام مش بيخفف في المواساه لكن اقل حاجه تعمليها تقفي جانبه ويمكن يفضل انك تقعدي ساكته بس خليكي جنبه لغايه مايتجاوز المحنه وماتجيبيش سبب او اي كلام عن المحنه ادامه

Maga يقول...
أزال المؤلف هذا التعليق.
Maga يقول...

وربك
اجيبها بس
وهركبلها تففافة تمشي تتف على البنى ادمين
وبدل الكلاكس هجيب شتامة
وعيش

Yasmine يقول...

ضحكتينى اوى على عربيتك..اصلى بعانى من نفس المشكلة..انا ساكنة فى شارع حيوى جدا و زحمة جدا و عشان تلاقى ركنة لازم تتخانقى مع امة لا اله الا الله..و كل يوم
بس تصدقى انا ما بقيتش بزعل من النوم على العربية ولا انى انزل الاقى حد ساند عليها هو و صحابه..دى حاجات بسيطة كبيرها تبوظ العفشة مش مشكلة يعنى
اللى بيفرسنى الاكل على عربيات الناس
من كام شهر نزلت لقيت واحد عاش حياته على العربية فطر و شرب و اتبسط و فى الاخر سابلى باقى كوباية الشاى و حتة من ساندويتش الطعمية بجد ما كنتش مصدقة نفسى..بس الراجل طيب قال يعمل حسابى معاه عشان لو كنت نازلة من بيتنا جعانة ولا حاجة:@

بالنسبة لصاحبك فا زى ما لكتر قال مجرد وجودك جنبه كفاية مش لازم تكلميه ساعات الكلام بيتعب اكتر خصوصا لو ما كانش فى ايدك حاجة تانية تعمليها

shabfa2re يقول...

Happy Eiiiiiiiiid

moodysalihamidzic يقول...

سالى..انتى طيبة اوى
:)